ՀՀ կառավարությունը Վերակառուցման և զարգացման եվրոպական բանկի
ֆինանսական աջակցությամբ այս տարվանից սկսում է Երևանի Մետրոպոլիտենի վերակառուցման
ծրագիրը։ Այդ նպատակով մարտի 10-ին Երևանում 15 մլն եվրո ընդհանուր արժողությամբ
վարկային համաձայնագիր կստորագրեն ՀՀ ֆինանսների նախարար Տիգրան Դավթյանը և ՎԶԵԲ-ի
երևանյան գրասենյակի ղեկավար Վալերիու Ռազլոգը։ Այդ թվում` 5 մլն եվրոն որպես
դրամաշնորհ կտրամադրի Եվրոպական Միության Հարևանության Ներդրումային ծրագիրը,
5-ական մլն եվրոյի չափով վարկեր կտրամադրվեն Վերակառուցման և զարգացման եվրոպական
բանկի և Եվրոպական ներդրումային բանկի միջոցներից։
Վարկային համաձայնագրով նշված միջոցառումների իրականացումն
ապահովելու նպատակով կստորագրվեն նաև "Ծրագրի աջակցության համաձայնագիր" Երևանի
քաղաքապետարանի և "Ծրագրի համաձայնագիր" Երևանի Կարեն Դեմիրճյանի անվան
Մետրոպոլիտեն ՓԲԸ-ի հետ։